Di rosaroti Blueme

Gschichte vom Abschied (1)

Godi Huber
Är chrampfed i der Firma für zwe u isch derbi zueverlässig wie as Uhrwärk. D Mitarbeiter hei ihm drum dr Übername Schwizer Uhr gä. Hüt säge mir ihm nume no Schwizer.

Für vieles i der Firma isch der Schwizer zueständig. Nume für Gfüeu nid. Gfüeu het im Büro näbe dranne sie verwautet. Mit ihrem fröhliche Wäse het sie vom Morge bis am Abe für gueti Stimmig gsorget. Wäge der Farb vo de Schueh hei mir ihre Rosarot gseit.

Trotz de Gägesätz hei die beide guet zäme gschaffet. Sie het sech verruckti Projekt usdänkt, er het mitghuefe, das si guet usechöme.

Eines Tages het Rosarot gseit, dass sie d Firma wot verlah. Bim Abschied het sie verläge a Träne tröchnet. U em Schwizer het sie a rosaroti Blueme i d Hang drückt.

Am nächschte Tag isch z Büro vom Rosarot lär blibe. Dr Schwizer het chrampfet wie verruckt. D Blueme uf sim Pult het er nid beachtet. Mir hei am Afang ds Gfüeu kha, das rosarote Blüemli sig ihm a chli pinlech.

Drei Tag später het dr Schwizer gmerkt, dass sech ds zarte Rosa ines kräftigs Rot verwandlet. Dr Aktebärg het är a so gschtaplet, dass das fine Pflänzli nid verdrückt wird.

Wieder a paar Tag später het er im Internet nach em Name für sini Blueme gsuecht. Er het usegfunge, dass es a Malve isch. Über 4000 Arte söus uf dr ganze Wäut gä. O dr Kakoboum u d Bauele ghöre derzue.

Wo dr Schwizer isch us em Wuchenänd zrüg cho, het sini Blueme dr Gring la hange. Er isch uf Toilette gsprunge u het d Vase mit früschem Wasser gfüut.

A paar Tag später het o früsches Wasser nümme gnützt. D Blueme isch gschtorbe. Aber i de Ouge vom Schwizer het si witer blüet. Er het vo Zit zu Zit dr Chopf dräit u dr vertrochnete Pflanze fröhlichi Blicke zuegworfe.

Wo das a Wuche lang so witer gange isch, hei mir Mitarbeiter am Verschtang vom Schwizer afa zwifle. U d Chunde het die spezieui Tischdekoration eher verwirrt aus erfröit.

Dr Schwizer het das nid interessiert. I der Pouse het är vo der Schönheit u Unvergänglichkeit vo sire Blueme gschwärmt.

A me Morge, wo dr Schwizer guet glunet a sim Arbeitsplatz het wöue abhocke, isch di rosaroti Blueme verschwunde gsi. Die nöii Putzfrou het uf sim Pult gründlech usgmischtet gha.