Der Schuelschatz

Gschichte vom Abschied (2)

Godi Huber
Wie ihre erscht Schuelschatz gheisse het, weiss si nümme. Aber sie cha sich no guet erinnere, dass der bescht Fründ vo däm Schuelschatz Michael gheisse het.
   I der vierte Klass isches gsi, wo ihre der Michael i der grosse Pouse uf em Schuelhof as Briefli vo ihm het bracht. Nächher si zwüsche däm junge Liebespaar vieli Briefe hin u här gange, u immer isch dr Michael, a chline u schüche Bueb, dr Bote gsi. Dank em Michael het die zarti Liebi o ohni SMS u Facebook chönne wachse. Äs isch so wit gange, dass der Michael drü bis viermal im Tag geduldig het Liebesbriefli hin u här treit.
   Amene sunnige Tag na de Herbschtferie isch dr Michael wieder vor ihre gschtange. Är isch no schücher gsi aus gwöhnlech u sofort wieder dervo gsprunge. Wo sie der Brief unger der grosse Linde het gläse, het sie gwüsst wieso. Ihre Schuelschatz het gschribe, dass är i de Ferie as angers Meitschi heig lere kenne. Därum sig das jetz si letscht Brief.
   Di goudige Bletter vo der Linde hei i däm Ougeblick ihre Glanz verlore.