Godi Huber
Cha ds Ändi vo me Fium dr Afang vore Gschicht sy? Cha ds Ändi vo me Liebesfium dr Afang vore richtige Liebi sy?
Dr Adrian het scho lang as Oug uf d Claudia gworfe gha, as hübsches Meitschi am angere Ändi vo der Strass, mit länge brune Haar u a me schüche Lächle. Aber mit syne Avance isch dr Adrian bir Claudia me aus einisch gschiteret.
Ersch wo dr Adriano, gnäuer dr Froueschwarm Adriano Celentano, its Dorfchino isch cho, het d Claudia äntlech Ja gseit.
I der hingerschte Reihe sy dr Adrian u d Claudia ghocket. Vore uf der Linwand het dr Adriano Celentano mit südländischem Scharm um d Liebi vo der schöne Ornella Muti kämpft.
"Dr Celentano eroberet jedes Frouehärz im Schturm, ig wet das eis einzigs mau o chönne", het dr Adrian ir Pouse zur Claudia gseit.
"Aber Adrian, das isch doch nume a Fiumkomödie", het d Claudia glachet.
Dr Adrian het de nümme gseit u a der Schoggiglace gschläcket, bis er nume no dr Schtängu ir hang gha het.
Am zwänzg vor Zäni isches passiert, dr Adriano het d Ornella küsst. Dr Adrian het i däm Momänt z Chnöi vor Claudia berüehrt u as eigenartigs Chribele im Buch gschpürt.
Zäh Minute später hei sech dr Adriano u d Ornella im Schlafzimmer igsperrt. Ds Publikum het dusse müesse warte. Dr Adrian het its sy heissi Hand uf d Hand vor Claudia gleit.
Viu meh isch a däm Abe nid passiert. Während em Abspann isch z Liecht a gange, d Claudia het as paar Mau blinzlet u nächher hei di zwöi i dr Beiz näbem Chino as Coci trunke.
Churz vor Mitternacht hei sech der Adrian u Claudia im Liecht vore schummrige Strasselatärne verchlemmt wie zwe Sunntigsschüeler verabschiedet.
Dr Adriano Celentano isch offebar irgend einisch wieder usem Schlafzimmer use cho u drei Monet später het ne z Radio ufe u abe gschpiut. "Azzurro" het ds Lied gheisse, wo di ganzi wäut het wöue lose.
D Claudia het zur gliche Zyt ir Schtadt a Steu ire Apithek gfunge u isch ine Mansarde ar Länggass zoge.
Dr Adrian het sech überleit, ob är der Claudia söu äs Briefli schribe. I däm Briefli hät söue schtah, dass z Ändi vom Liebesfium mit em Adriano Celentano der Afang vo ihrer grosse Liebi chönnti sy. Är, dr Adrian, wär uf jede Fau bereit, a Afang z wage.
Wo dr Adrian im Chopf das Briefli het gschribe kha, schteut är sech vor, wie d Claudia ar Länggass zum Briefchaschte geit, ds Briefli use nimmt, uf a Poststämpu luegt u de gwundgrig ds Kuver ufrisst. Dr Adrian gset, wie d Claudia sys Brifli einisch liest, as zwöits mau liest, schüch lächlet u de flüschteret: "Aber Adrian, ds richtige Läbe isch doch kei Liebesfium."
Drum het der Adrian dä Brief nid gschribe. Drum het der Adrian z Härz vor Claudia nie chönne erobere.
U drum isch jetz klar, dass i dere Gschicht z Ändi vom Liebesfium nid der Afang vore richtige Liebi cha sy.
Keine Kommentare:
Kommentar veröffentlichen